समिर अलि बेहना बाँके, ७ चैत्र । बाँकेको नेपालगंज उपमहानगरपालिका वडा नं. ४ मा अपाङ्गता सम्बन्धी राष्ट्रिय, अन्तराष्ट्रिय कानुन, स्थानीय निकायको भूमिका सम्बन्धी अभिमुखीकरण कार्यक्रम सम्पन्न भएको छ ।
शुक्रबार मानव अधिकार संरक्षण तथा प्रवद्र्धन केन्द्र (हुरीपप) को आयोजना र नेपालगंज उपमहानगरपालिका वडा नं.४ को आर्थिक सहयोगमा आयोजना गरीएको कार्यक्रममा आफनो भनाई राख्दै वडा अध्यक्ष मोहम्मद सफिक बेहनाले हरेक कुरामा अपाङ्गता र लक्षित बर्गलाई प्राथमिकतामा राखेर कामहरु अगाडी बढाईएको बताउनुभयो । अध्यक्ष बेहनाले अपाङ्गता भएका व्यक्तिहरुलाई आफ्नो क्षमता र कानुनले दिने सम्मको कुनैपनि कुराहरु बाँकी नराख्ने बताउनुभयो ।
उहाँले अपाङ्गता व्यक्तिहरु भनेका आफैमा आत्मनिर्भर हुन नसक्ने हुदा आफ्नो क्षमता अनुसारको सिप सिकी आत्मनिर्भर बन्न आग्रह गर्नु भयो । अध्यक्ष बेहनाले स्थानिय सरकारको तर्फबाट अपाङ्गता क्षेत्रमा गर्नुपर्ने भूमिकामा केहि कमी हुने नदिने बताउदै वडा भित्र बन्ने संरचनाहरु अपाङ्गमैत्री बनाउने प्रतिबद्धता व्यक्त गर्नुभएको थियो ।
त्यस्तै कार्यक्रममा बोल्दै वडा सचिव गौरी कुमारी शाहीले, शरीरिक अपाङ्गता संगै मानसिक रुपमा अपाङ्ग भएकाहरुको सख्या बढदै गएको बताउदै अपाङ्गता भएकाहरुलाई सहनुभूति दिनु पर्ने बताउनु भयो । उहाँले उनिहरुको जिवन स्तर उकास्न र मनोगतरुपमा अपांग नभएको महशुस गराउन वडा नं. ४ को कार्यालयले बिभिन्न कार्यक्रमहरु निमार्ण गरी संचालन गर्दै आएको थियो ।
अनुशिक्षण कार्यक्रममा पत्रकार डक्ट प्रसाद धितालले अपाङ्गता भएको व्यक्तिहरु सम्बन्धी विद्यमान राष्ट्रिय, अन्तराष्ट्रिय कानुनको बारेमा जानकारी, अपाङ्गता भएका व्यक्तिहरुलाई प्रदान गरिने सेवा सुविधा, अपाङ्गताको वर्गीकरण र प्रकार, अपाङ्गता मैत्री भौतिक संरचना लगायतका विषयमा सहजिकरण गर्नु भएको थियो ।
थर्ड एलायन्सका प्रमुख आलम खानले अपाङ्गता सम्बन्धी कानुनहरु प्रभावकारी कार्यान्यन हुन नसकेको बताउदै आरक्षणमा दुरुपयोग भएको तथा स्थानीय सरकारहरु अपाङ्गतामैत्री हुन नसक्नु दुभाग्र्य भएको बताउनु भयो । उहाँले मानव अधिकारको संरक्षण तथा प्रवद्र्धन गर्न तर्फ वडालाई सक्रिया हुन सुझाव दिनु भएको थियो । हुरीपपका तर्फबाट खानले वडा अध्यक्ष बेहनालाई मानव अधिकार मैत्री निति निमार्ण गरी नमूना वडा बनाउन सुझाव दिदै हुरीपप संग सहकार्य गरी कार्यक्रम संचालन गरी दिनु भएको भन्दै कदर पत्रबाट सम्मान गर्नु भएको थियो ।
प्रमुख खानले संघीय संरचनाबाट तीन तहको सरकार निर्माण भएको लामो समय भई सकेकोले अब अपांगता भएकाहरुको आवाज स्थानिय तहमै सुनुवाई हुनु पर्ने बताउनु भयो । फरक प्रसंगमा खानले नेपालगंज वडा नं. ४ ले अपाङ्गताहरु प्रति गम्भीर भएको र अपाङ्गता क्षेत्रका लागि छुट्याइएको बजेट कार्यान्वयनको थालनी गरेकोले बधाई दिनु भएको थियो ।
कार्यक्रममा बिभिन्न प्रकारका अपाङ्गता बारेमा जानकारी,स्थानिय स्तरमानै अपाङ्गता भएका व्यक्तिहरुको पहिचान गरी अभिलेखीकरण गर्ने र अपाङ्गता परिचय पत्र उपलव्ध गराउन सहजीकरण गर्ने, हालसम्म नगरपालिकामा महिला तथा बालबालिका,ज्येष्ठ नागरिक र अपाङ्गता शाखाबाट अपाङ्गता भएको व्यक्तिहरुको पहिचान गरी कार्ड वितरण गर्ने कार्य जारी रहेको वडा सदस्य मेनका बैद्यले जानकारी गराउनु भएको थियो ।
अभिमुखीकरण कार्यक्रममा शरीरिक रुपमा अपाङ्गता रहेकि वडा नं. ४ कि नूरुलफा हल्वाईलाई सहायक सामाग्री व्हिल चियर सहित वडा अध्यक्ष बेहना,सचिव गौरी,लेखापाल सोनी लगायतले संयुक्त रुपमा हस्तन्त्रण गरेका थिए भने हल्वाई समाजका कोषाध्यक्ष बाबु हल्वाईले ५ हजार १ सय रुपिया नगद हस्तान्त्रण गर्नु भएको थियो ।
कोरोना भाईरसको त्रास फैलिरहेका बेला हल्वाई समाजले कार्यक्रममा सहभागि हुन आएका सबै जनालाई मास्क वितरण गरेको थियो ।
हुरीपपका उपाध्यक्ष मोहम्मद ज्याउल हकले सामाजिक सुरक्षाको ग्यारेन्टि गरिनु पर्ने बताउदै अपांगता भएको आवाजलाई नदबाई उनीहरुको मानव अधिकारलाई सम्मान गर्दै सोहि अनुसारको सिप प्रदान गरेर जीवन यापन सहज हुन सके अपांगता भएकाहरुलाई केहि राहत हुने बताउनु भएको थियो ।
हुरीपपका उपाध्यक्ष मोहम्मद ज्याउल हकको अध्यक्ष्यतामा सम्पन्न कार्यक्रममा वडा अध्यक्ष मोहम्मद सफिक बेहना, वडा सदस्य मेनका बैद्य,जयपत्रा कोरी,वडा सचिव गौरी कुमारी शाही, लेखापाल सोनी खडका, थर्ड एलायन्सका प्रमुख आलम खान, नेपाल हल्वाई समाज बाबु हल्वाई, यूथ टुडेका कार्यकारी सम्पादक मोबिनुद्दीन सिद्धिकि, जनप्रतिनिधि, स्वयमसेविकाहरु, अपाङ्गता अधिकारकर्मी लगाएतको सहभागिता रहेको कार्यक्रमको संचालन पत्रकार पुजा बैश्य र यूवा डाँगीले गर्नु भएको थियो ।
Discussion about this post