बाँके चैत १२ गते । कोरोनाको संक्रमण देखिएको काठमान्डौं की १९ वर्षीया किशोरी चढेको जहाजमा बाँकेका चार जना रहेको खुलेको छ । उनीहरुको खोजी भइरहेको बाँकेका एसपी वीरबहादुर ओलीले अनलाइन खोजखवरलाई बताउनुभयो । गत चैत्र ४ गते फ्रान्सबाट कतार हुँदै आएको जहाजमा रहेकी किशोरीलाई कोरोना संक्रमण देखिएको थियो । उनको टेकु अस्पतालमा आइसोलेसनमा राखेर उपचार भइरहेको छ। त्यही जहाजमा बाँकेका चार जना समेत रहेको र उनीहरुलाई खोजेर क्वारेन्टाइनमा राख्न बाँकेमा पत्र आइपुगेको हो ।चारै जनाको नाम र नागरिकता नम्बर खुलाएर पठाइएको भएपनि ठेगाना भने खुलाइएको छैन । ठेगाना नखुल्दा नागरिकता नम्बरको आधारमा उनीहरुको खोजतलास भइरहेको प्रहरीले जनाएको छ । उनीहरुलाई खोजेर केही दिन क्वारेन्टाइनमा राख्न निर्देशन आएकाले प्रहरी त्यसतर्फ अघि बढेको हो। चैत ४ गते दोहाबाट १५८ जना यात्रु लिएर उक्त विमान काठमान्डौ आएको थियो । आएका अधिकांश सम्पर्कमा आइसकेको प्रहरीले जनाएको छ ।
Discussion about this post