बाँके चैत्र २० गते । इलाका प्रहरी कार्यालय कोहलपुरमा करिब ३०० भन्दा बढि मोटरसाइकलहरु कार्यालय परिसरमा थन्किएका छन् । लकडाउनको अवज्ञा गर्दै अनावश्यक रुपमा सवारी साधन चलाएको भन्दै ती मोटरसाइकलहरु नियन्त्रणमा लिइएको इलाका प्रहरी कार्यालय कोहलपुरका डिएसपी कुलदीप चन्दले जानकारी गराए । उनले भने–‘कोरोना भाइरसको संक्रमण चारैतिर फैलिन सक्ने कारणले सरकारले अर्को सूचना प्रकाशित नहुने बेलासम्मका लागि देशमा लकडाउन गरेको छ । यस्तो अवस्थामा सरकारले जारी गरेको सूचना या आदेश नमान्ने जो कोहिलाई पनि कार्वाही गर्छौ ।’ उनले भने अनावश्यक रुपमा निस्केका हरुको मोटरसाइकल मात्र नियन्त्रणमा लिइएको बताए। उनले कोरोना भाइसरबाट कोही पनि संक्रमित नहोउन्, कसैले पनि यसबाट दुःख नपाउन् भनेर आफूहरु रातदिन खटेर काम गरेका बताए । डिएसपी चन्दले इमर्जेन्सी काममा कतै जानु परे नजिकैको प्रहरी कार्यालय या डिउटीमा खटिएका प्रहरीहरुबाट सहयोग लिन सबैलाई अनुरोध पनि गरेका छन् । नियन्त्रणमा लिइएका मोटरसाइकलहरु लकडाउन खुलेपछि सम्बन्धित व्यक्तिहरुलाई फिर्ता दिइने इलाका प्रहरी कार्यालयले जनाएको छ ।
Discussion about this post