काठमाडौं बैशाख ६ गते । बरु भोका भए खान दिनु तर कसैलाई पनि हिडेर गाउँ जान नदिनु भन्ने प्रधानमन्त्री केपी शर्मा ओलीको निर्देशन २४ घण्टामै उल्टिएको छ । शुक्रबार मन्त्री र सुरक्षाकर्मीलाई बोलाएर यस्तो कडा निर्देशन दिएका प्रधानमन्त्रीको आदेश अवज्ञा गर्दै काठमाडौँका सांसद र जनप्रतिनिधिले अलपत्र परेकालाई बस चढाएर गन्तव्यमा पठाएका छन ।
काठमाडौंका सांसद, चन्द्रागिरि नगरपालिकाका जनप्रतिनिधिले पैदलै हिडेर गाउँ जान खोजेका तर शुक्रबार प्रधानमन्त्रीको आदेशपछि रोकिएका अलपत्र झण्डै तीन सय मानिसलाई बस चढाएर शनिबार गन्तव्यसम्म पठाएका हुन ।
प्रधानमन्त्रीको आदेश लगत्तै रोकाइएका उनीहरुलाई शनिबार बिहान भात खुवाएर बेलुकी बस चढाएर पठाइएको चन्द्रागिरी नगरपालिकाका एक जना जनप्रतिनिधिले जानकारी दिए । ७ वटा बस चढाएर पठाइएका उनीहरु पश्चिम नेपालका हुन ।
पैदलै भएपनि घर जान हिडेकालाई रोक्नु भन्ने प्रधानमन्त्रीको झन चर्को आलोचनापछि प्रदेश सरकार र पालिका सरकारले आफूले सकेसम्म नागरिकको उद्धार र यात्रा सहजतामा सहयोग गरिरहेका छन ।
Discussion about this post