जिससको भवनमा आइसोलेसन

बर्दिया जेठ १५ गते ।
बर्दियाका आठ वटै स्थानीय तहले अग्रसरता देखाएपछि जिल्ला समन्वय समितिको सभाकक्षको भवनमा कोरोना संक्रमितका लागि आइसोलेसन कक्ष बनाइएको छ । हाललाई २६ शय्याको कोरोना संक्रमितका लागि उपचार केन्द्र बनाइएको जिससका प्रमुख शंकरप्रसाद थारुले बताए । जिल्लामा कोरोना संक्रमितका लागि उपचार केन्द्र नहुँदा बाँके लगायत जिल्लामा जानु पर्ने बाध्यता रहेको छ ।

जिससको भवनमा कोरोना संक्रमित उपचारका लागि सबै तयारी पुरा भइसकेको प्रमुख जिल्ला अधिकारी प्रेमलाल लामिछाने बताए । ६ नगरपालिका र दुई गाउँपालिकाले आइसोलेशन निर्माणका लागि ५र५ ला रुपैयाँ सहयोग गरेको प्रजिअ लामिछानेले बताए । आइसोलेशन वार्डमा जेनेटरसहित एसी जडान गरिएको छ ।

संक्रमितको उपचारका लागि दुई जना डाक्टर र सुरक्षाकर्मी तैनाथ हुनेछन् । अब कोरोना संक्रमित भए यहीँबाट उपचार हुने प्रजिअ लामिछानेले बताए । यस बाहेक जिल्लाका तीन वटा प्राथमिक स्वास्थ्य केन्द्र राजापुर, मगरागाडी र सोरहवामा पनि कोरोना संक्रमितका लागि उपचार केन्द्र बनाउन लागिएको छ ।

बारबर्दिया र बासगढी नपाले आइसोलेशन वार्ड निर्माण गरिएको छ । बारबर्दियामा १० र बासगढीमा १५ वार्ड रहेका छन् । राजापुर नगरपालिका ५ की एक बालिका कोरोना संक्रमित हुँदा उपचार गर्ने बाँकेका खजुरा अस्पतालमा महिला बस्‍ने कक्ष नभएपछि दाङ लैजाने तयारी गर्दा त्यहाँ विरोध भएको थियो ।