बाँके साउन ६ गते ।
वीपी कोइरालाको ३८ औं स्मृति दिवसका अवसरमा तरुण दल बाँकेले मंगलवार नेपालगन्ज उपमहानगरपालिका १३ मा रहेको उदयपुर स्वास्थ्य चौकीको खाली जमिनमा बृक्षारोपण गरेको छ ।
नेपाली काँग्रेस बाँकेका सभापति किरण कोइराला, प्रदेश पाँचका सांसद तथा काँग्रेस सचेतक सुरेन्द्र हमाल, प्रदेश पाँचका सांसद याकुव अनसारी लगायतले बृक्षारोपण गर्नुभएको थियो । बृक्षारोपण अघि आयोजित औपचारिक कार्यक्रममा बोल्ने सहभागी नेताहरुले वीपी कोइरालाको समाजवादको सिद्धान्तलाई काँग्रेसीहरुले विर्सिदै गएको भन्दै चिन्ता व्यक्त गरेका थिए ।
तरुण दल बाँकेका अध्यक्ष वीरेन्द्र बहादुर शाहको सभापतित्वमा भएको कार्यक्रममा बोल्दै प्रदेश पाँचका सांसद तथा काँग्रेस सचेतक सुरेन्द्र हमालले वीपीको आर्दशलाई सबै नेता तथा कार्यकर्ताहरुले स्मरण गर्नुपर्ने धारणा राख्नुभयो ।
वर्तमान अवस्थामा वीपीको आर्दशलाई प्रत्येक काँग्रेसीहरुले आत्मसाथ गर्नुपर्ने आवश्यकता उहाँले औल्याउनुभएको छ । पार्टीलाई एक ढिक्का बनाएर अघि बढ्नुको विकल्प नभएको पनि उहाँको तर्क छ । उहाँले पार्टी एकताका लागि स्थानीय तहदेखि नै पहल थाल्नुको विकल्प नभएको बताउनुभयो ।
नेपाली काँग्रेस बाँकेका सभापति किरण कोइरालाले वीपीको विचार र चिन्तनलाई सबैले पालना गर्ने हो भने पार्टी एक भएर अघि बढ्ने धारणा व्यक्त गर्नुभयो । उहाँले पार्टी एक भएमात्र वर्तमान सरकारका गलत कदमहरुको प्रतिवाद गर्न सकिने बताउनुभयो ।
कार्यक्रममा प्रदेश सांसद याकुव अनसारी, संबिधानसभा सदस्य मैकुलाल बाल्मीकि, बादशाह कुर्मी, महासमिति सदस्य लक्ष्मी नारायण शाह, राजकुमार वर्मा, क्षेत्रीय सभापति रमेश कुमार गुप्ता, नेपाल महिला संघका अध्यक्ष नारायणी रुपाखेतीलगायतले आ आफ्नो धारणा राख्नुभएको थियो ।
Discussion about this post