प्रदेशका सबै कोरोना अस्पतालको स्तरोन्नति गरिन्छ : मुख्यमन्त्री पोखरेल

बाँके असोज ४ गते ।
प्रदेश ५ का मुख्यमन्त्री शंकर पोखरेलले प्रदेशका सबै कोरोना विशेष अस्पतालको स्तरोन्नति गरिने बताउनुभएको छ ।

दाङ देउखुरीको गढवामा निर्माण गरिएको सर्पदंश उपचार केन्द्रको उद्घाटन गर्दै मुख्यमन्त्री पोखरेलले कोरोनाका लक्षण भएका विरामीको आइसियुमा उपचार गर्न थालिएको भन्दै अब प्रदेशका ४ वटै अस्पतालमा थप सेवा विस्तार गरिने बताउनुभयो ।

आधुनिक विधि प्लाज्मा थेरापिसँगै परम्परागत विधि आयुर्वेदिक तथा प्राकृतिक विधिको पनि प्रयोग गर्ने भन्दै उहाँले प्रदेशमा आधुनिक तथा परम्परागत विधिबाट पनि उपचार थालिने जानकारी दिनुभयो ।

कोरोनाबाट बच्नकालागि स्वास्थ्य मापदण्ड पालना गर्न आग्रह गर्दै मुख्यमन्त्री पोखरेलले संक्रमितमध्ये ७५ प्रतिशत भन्दा बढी निको भएकोले डराउनु पर्ने अवस्था नरहेको आस्वस्त पार्नुभयो ।