बाँके असोज २४ गते।
कोहलपुर नगर क्षेत्रभित्र अत्याधुनिक बसपार्क निर्माण हुने भएको छ । बसपार्क निर्माणकालागि कोहलपुर नगरपालिका र नगर विकास कोषबिच ऋण सम्झौता भएको छ । २ वर्षभित्र निर्माण सम्पन्न गर्ने गरी नरगपालिका र नगर विकास कोषबिच ऋण सम्झौता भएको कोहलपुर नगरपालिकाका प्रवक्ता माधव रिजालले जानकारी दिएका छन । कोहलपुर नगरपालिकाका मेयर लुटबहादुर रावत र नगर विकास कोषका कार्यकारी निर्देशक कृष्ण प्रसाद सापकोटाले दुई पक्षिय ऋण सम्झौतामा हस्ताक्षर गरेका छन ।
कोहलपुर चौराहदेखी पुर्वतर्फ रहेको नगरविकास समितिको खाली जग्गामा ४६ करोड ३५ लाख ३० हजार लागतमा अत्याधुनिक बसपार्क निर्माण गरीने बताईएको छ । नयाँ बन्ने बसपार्क बालमैत्री, सूचनामैत्री, प्रविधिमैत्री, खानेपानी, ढल निकास, भूमिगत बिद्युतीकरण, रिफ्रेसमेन्ट सेन्टर र सपिङ कम्प्लेक्स सुविधा सहितको हुने नगरपालिकाले जनाएको छ ।
सम्झौता अनुसार नगर विकास कोषले कोहलपुर नगरपालिकालाई २७ करोड ९९ लाख १८ हजार ऋण उपलब्ध गराउने भएको छ । बसपार्क निर्माणकालागि अनुमानित लागतमध्ये ६० प्रतिशत ऋण उपलब्ध गराउन नगर विकास कोष तयार भएको रिजालले जानकारी दिए । नगरपालिकाको ४० प्रतिशत (१८,६६,१२,०००) र नगर विकास कोषको ६० प्रतिशत (२७,९९,१८,०००) लागतमा अत्याधुनिक बसपार्क निर्माणकालागि दुई पक्षिय सम्झौता भएको हो । सम्झौता अनुसार २ वर्षभित्र बसपार्क निर्माण गरीसक्नुपर्ने छ ।
Discussion about this post