बाँके कार्तिक २४ गते ।
नेकपा एकीकृत समाजवादीका अध्यक्ष माधवकुमार नेपालले एमालेको चुनाव चिन्ह सूर्यमा ग्रहण लागेको टिप्पणी गर्नुभएको छ ।
आज नेपालगन्जमा आयोजित पार्टी कार्यकर्तालाई सम्वोधन गर्दै नेपालले एमालेमा रहँदा आफूले नै सूर्य चिन्ह ल्याएको भए पनि अब त्यसमा ग्रहण लागिसकेको दाबी गर्नुभयो ।
‘सूर्य चिन्ह ल्याउने मान्छे मै हुँ,’ नेपालले भन्नुभयो–‘तर के गर्ने त्यही अहिले सूर्य चिन्हमा ग्रहण लागेको छ । अहिले हामी कलम लिएर अघि बढेका छौं । अब जनताले चिन्ने छन् न्यायको पक्षमा उभिने कलम नै हो ।’
पाँच पार्टीको गठबन्धन बनेको भन्दै नेपालले आउने चुनावमा ‘केपी ओली गुट’ पत्तासाफ हुने दाबीसमेत गर्नुभयो । समाजवादीकै नेता रहनुभएका संस्कृति तथा पर्यटनमन्त्री प्रेम आलेले ओलीका कारण मुलुकमा सम्बृद्धि स्थापित हुन नसकेको बताउनुभयो ।
उहाँले गफ गर्ने तर काम नगर्ने ओली प्रवृत्तिलाई चिर्न जरुरी रहेको बताउनुभयो ।
Discussion about this post