बाँके माघ १४ गते ।
इलाका प्रहरी कार्यालय कोहलपुर बाँकेको परिसरमा निर्मित नागरिक सहायता कक्ष र महिला, बालबालिका तथा जेष्ठ नागरिक सेवा केन्द्र भवनको उद्घाटन गरिएको छ । कोहलपुर नगरपालिकाका नगर प्रमुख पूर्ण प्रसाद आचार्य र लुम्विनी प्रदेशका प्रहरी प्रमुख प्रहरी नायव महानिरीक्षक कुवेर कडायतले संयुक्तरुपमा उद्घाटन गरेका हुन् ।
कोहलपुर नगर विकास समितिको २२ लाख ६२ हजारको सहयोगमा चार कोठे भवन निर्माण भएको छ । कार्यक्रमलाई सम्वोधन गर्दै नगर प्रमुख आचार्यले भवन निर्माणसँगै सेवाग्राहीलाई छिटोछरितो र सहज तरिकाले सेवाप्रवाह गर्न सुझाव दिए । कोहलपुर नगर विकास समितिका अध्यक्ष समेत रहेका नगर प्रमुख आचार्यले आम नागरिकको आवश्यकतासँग जोडिएका संरचना निर्माण आफ्नो प्राथमिकता रहेको पनि बताए । ‘यहाँ ३० औं करोडका भवन निर्माण भएका छन् ।
करोडौं संरचनाका भवनको शिलान्यास मैले आफै गरेको छु उनले भने–‘आज जस्तापाताले छाएको भवन उद्घाटन गर्न पाउँदा जस्तोको गौरवानुभूति कहिल्यै मिलेको थिएन् ।’ यस्तै लुम्विनी प्रदेशका प्रहरी प्रमुख प्रहरी नायव महानिरीक्षक कुवेर कडायतले स्थानीय सरकारको सहयोगमा निर्मित भवनबाट प्रहरीले जनमैत्री सेवा प्रवाह गर्ने प्रतिबद्धता जनाए । उनले इप्रका कोहलपुरले कार्यालयलाई व्यवस्थित र सौन्दर्यकरण गरेर अनुकरणीय कार्य गरेको भन्दै प्रहरीले नागरिकलाई दिने सेवा पनि स्तरीय हुनुपर्नेमा जोड दिए ।
बाँकेका प्रमुख जिल्ला अधिकारी श्रवण कुमार पोख्रेलले पनि इप्रकाको काम प्रशंसनीय रहेको भन्दै अन्य सरकारी कार्यालयले पनि सिक्नु पर्ने बताए । उनले व्यक्तिगत सौन्दर्यतासँगै कार्यालयको सान्दर्यता पनि महत्वपूर्ण हुने उल्लेख गरे । इप्रका कोहलपुरको प्रमुखको रुपमा गएको फागुन १ गते हाजिर भएका प्रहरी नायव उपरीक्षक सुन्दर तिवारीले कार्यालयको पुरै रुपरेखा फेरिदिएका छन् ।
कार्यालयमा आउने सेवाग्राहीलाई सहज र सरल तरिकाबाट सेवा प्रवाह गर्ने संयन्त्रको विकाससँगै उनले कार्यालयलाई अत्यन्तै सौन्दर्यकरण गरेका छन् । कार्यालयका पर्खालहरुम चेतनामुलक भनाइहरु लेखिएका बोर्डहरु टाँसिएको छ । त्यसैगरी नागरिक सहायता कक्ष, दर्ता चलानी कक्ष, सूचना अधिकारी तथा गुनासो सुन्ने अधिकारीको कक्ष समेत निर्माण भएका छन् ।
यसअघि छरिएर रहेका ती कक्षहरुलाई एकद्धार प्रणालीमा समेटेर सहज, सरल र छिटोछरितो सेवा प्रवाह गर्नेगरी व्यवस्थापन गरिएको इप्रका कोहपुरका प्रमुख तिवारीले बताए । उनका अनुसार प्रहरीमा उजुरी दिन आउनेलाई निःशुल्क निवेदन लेख्ने संयन्त्रको विकास गरिएको छ ।
कानुनी सहायताका लागि यो अवधिमा एक हजार ८ सय ७३ वटा उजुरी निःशुल्क लेखिएको उनले बताए । जवकी यही उजुरी लेख्न यसअघि कार्यालयबाट सेवाग्राहीले एउटा उजुरीको एक हजार देखि दुई हजारसम्म विचौलिएकाहरुलाई तिर्नुपर्ने अवस्था रहेको थियो ।
Discussion about this post