अवैध बोइलर चल्ला बरामद

बाँके चैत ३ गते ।
नेपालगन्जका विभिन्न स्थानबाट प्रहरीले अवैध बोइलर कुखुराका चल्ला बरामद गरेको छ । प्रहरीले करिव साढे १२ लाख मुल्य बराबरको अवैध बोइलरको चल्ला बरामद गरेको जनाएको छ ।

जिल्ला प्रहरी कार्यालयबाट खटिएको प्रहरीको टोलिले नेपालगन्ज उपमहानगरपालिका १८ भुजईगाउँ र डुडुवा गाउँपालिका ६ हिरमिनियाबाट भारतबाट अवैध रुपमा भित्र्याइएका १२ लाख ४० हजार मुल्य बराबरको अवैध चल्ला बरामद गरेको हो ।

भारतबाट अवैधरुपमा भन्सार छली चोरी निकासी पैठारी गरी ५९ पेटी अर्थात पाँच हजार नौ सय गोटा चल्ला बरामद भएको छ । भुजईगाउँबाट पाँच लाख ९० हजार बराबरको र हिरमिनियाबाट ६ लाख ५० हजार बराबरको अवैध चल्ला बरामद भएको प्रहरीको भनाइ छ । चल्ला ढुवानीमा संलग्न अटो र मानिस सहित थप कारवाहीका लागि पशु क्वारेन्टाइन कार्यालय नेपालगन्जमा बुझाइएको पनि प्रहरीले जनाएको छ ।

यस्तै नेपालगन्ज उपमहानगरपालिका १८ कारकाँदोबाट अवैधरुपमा ल्याइएको माछा पनि प्रहरीले बरामद गरेको छ । २ हजार ४ सय मुल्य बराबरको ८ किलो माछा बरामद भएको प्रहरीले जनाएको छ । बरामद गरिएको माछा थप कारवाहीका लागि पशु क्वारेन्टाइन कार्यालय नेपालगन्जमा बुझाइएको पनि प्रहरीले जनाएको छ । भारतबाट प्रतिवन्धित चल्ला नेपाल भित्र्याइएको सूचनाका आधारमा प्रहरीले चेकजाँच गरेको हो ।