तस्करसँग मोटो रकम लिने भन्सार विओपीका डिएसपी थापाको हर्कत : सर्वसाधारणमाथि अभद्र ब्यवहार, तस्करलाई मस्ती

बाँके बैशाख ६ गते ।
नेपालगन्ज भन्सारमा खटिएको सशस्त्र प्रहरी वलका इन्चार्ज डिएसपी अस्विन थापाले सर्वसाधारणलाई त्रसित बनाउने र गैरजिम्मेवार ब्यवहार गर्दै आएका छन् ।

तस्करसँग मोटो रकम लिएका उनी आम समुदायलाई देखाउन सर्वसाधारणलाई दुख दिँदै आएका छन् ।
उनले घर खर्च तथा विवाहका लागि ल्याउन लागेको मिठाई खोस्ने र अभद्र ब्यवहार गर्दै आएको नेपालगन्ज उपमहानगरपालिका ४ का एकरार हल्वाईले बताए ।

उनले विवाहका लागि ल्याउन लागेको मिठाई खोसेर आफ्नो कार्यालयमा लगेको बताए । ‘विवाहका लागि पाँच किलोग्राम मिठाई ल्याउँदै थिएँ । जमुनाह नाकामा बसेका डिएसपी थापाले खोसेर आफ्नो कार्यालयमा पठाए,’ उनले भने, ‘आँखा राताराता थिए । उनको ब्यवहार हेर्दा मादक पदार्थ सेवन गरेको जस्तो लाग्थ्यो । बोली वचन एकदमै रुखो थियो । सुन्दा पनि नपच्ने खालको गाली दिए ।’

घर खर्चका लागि ल्याउने सामानमा आँखा लगाउने डिएसपी थापाले तस्करसँग ठूलै रकम लिने र सामान ल्याउन सघाउँदै आएको खुलासा भएको छ । सर्वसाधारणबाट खोसेको चिसो पेय पदार्थ ड्यू उनकै कार्यालयका सशस्त्र प्रहरीले विक्रिका लागि पसलमा ल्याएको अवस्थामा स्थानीयले फेला पारेका थिए ।

सम्बन्धित समाचार

सिधनियाघाटमा पुल निर्माणको काम तीव्र

अमेरिकी खर्बपति एलन मस्कलाई नेपाल आउन प्रधानमन्त्री ओलीको निम्तो

चारवटा प्रदेशका पहाडी भू–भागमा वर्षाको सम्भावना

सर्वसाधारणबाट खोसेर कार्यालयमा राखेको ड्यू उनै डिएसपी मातहतका सशस्त्र प्रहरीले पसलमा विक्रि गर्न लागेको फेला पारेपछि स्थानीयले नियन्त्रणमा लिन खोज्दा उक्त प्रहरी जवान पर्खाल फाल हालेर कार्यालयभित्र छिरेको प्रत्यक्षदर्शी बताउँछन् ।
अवैध चोरी निकासी नियन्त्रण तथा भन्सार कार्यालय सुरक्षार्थ खटिएको सशस्त्र प्रहरीले भारतबाट आएर नेपालगन्ज भन्सारको कम्पाउण्डमा रहेका ट्रक र ट्यांकरको ब्याट्री, जग लगायतका सामान चोरी गर्दै आएको अनलाइन खोज खवरलाई सूचना प्राप्त भएको छ ।

गोप्य स्रोतका अनुसार भन्सार कार्यालय भित्र रहेका सशस्त्र प्रहरीले भन्सारका लागि नियन्त्रणमा लिएका सामान समेत गायव गर्दै आएका छन् । ‘भन्सारका लागि भनेर खोसेर लैजान्छन् । आज हुँदैन, भोली आउनुस भन्छन् । अर्को दिन जाँदा सामान नै हुँदैन,’ नाम नबताउने सर्तमा एक पीडितले भने ।

भन्सार विओपीमा कार्यरत डिएसपी थापाले महिलालाई समेत लछारपछार गर्ने र अभद्र ब्यवहार गरेको सामान किनेर भारतबाट आउने महिला बताउँछन् । मादक पदार्थ सेवन गरि ड्यूटीमा रहेका डिएसपीले आफूलाई हातपात गरेको र अपशब्द प्रयोग गरेको कोहलपुरकी सम्झना शर्माले बताइन् । मादक पदार्थ सेवन गरेका उनले डिएसपी थापाले शरिरमा हात लगाएको उनले बताइन् । ‘विवाहको लागि सामान ल्याउँदै थिएँ । विवाहको हो भनेर कार्ड समेत देखाएँ, तर मादक पदार्थ सेवन गरेका डिएसपीले लछारपछार गर्दै सामान खोसेर लगे,’ उनले भनिन् ।

सर्वसाधारणको थोरै सामानमा आँखा लगाउने ति डिएसपीकै बाटो भएर १२८० पाकेट खुकुरी चुरोट भारत लैजाँदै गरेको अवस्थामा इलाका प्रहरी कार्यालय जमुनाहले बरामद गरेको छ । ‘नेपालगन्ज भन्सार कार्यालय अगाडीबाट त्यतिधेरै चुरोट भारततर्फ लैजाँदै गर्दा ति डिएसपी कता थिए ? यो सेटिङ नभएर के हो ?,’ एक स्थानीयले भने ।