बैशाख १ गते । सुदूरपश्चिम प्रदेशमा भारत तथा तेस्रो मुलुकबाट आएर सिधै घर बस्नेको संख्या क्वारेन्टिनमा बस्नेको भन्दा निकै धेरै छ । भारतबाटमात्रै सुदूरपश्चिमका विभिन्न नाका भएर डेढ लाख मानिस भित्रिएका छन् । तिमध्ये १ लाख ३१ हजार मानिसहरु सुदूरपश्चिमकै भएको तथ्यांक छ । उनीहरु सबै क्वारेन्टिनमा बस्नु पर्ने हो । तर क्वारेन्टिनमा बस्नेको संख्या २० हजार पुगेको छैन् । उनीहरुमध्ये अहिलेसम्म ५ हजारको समेत नमूना परीक्षण हुन सकेको छैन्। धनगढीका दुईवटा ठाउँमा संघीय सरकारले स्थापना गरेको प्रयोगशालामा संकलन गरेको नमूनामध्ये अहिलेसम्म ५ सय ७६ जनाको रिपोर्ट आएको सेती प्रादेशीक अस्पतालका प्रवक्त डाक्टर जगदीश जोशीले जानकारी दिनुभयो । त्यसमा ५ जनामा कोरोना देखिएको छ । ति प्रयोगशालाबाट २ हजार ३ सय ९१ जनाको नमूना परीक्षण गरिएको थियो । अन्यको रिपोर्ट आउन बाँकी छ। त्यस्तै सरकारले सुदूरपश्चिमका ९ जिल्लामा र्यापिड टेस्टबाट अहिलेसम्म २ हजार ३ सय ९ जनाको नमूना संकलन गरेको छ । प्रदेशका सामाजिक विकास मन्त्री कृष्ण सुवेदीले केन्द्र सरकारले १० हजार मात्रै र्यापिड टेस्ट किट पठाएको बताउनुभयो । भौगोलिक विकटताका कारण विदेशबाट आएकाहरुको निगरानी समेत फितलो भएको स्विकार गर्दै मन्त्री सुवेदीले नमूना परीक्षणको दायरा बढाउने गरी प्रदेश सरकार लागि परेको दावी गर्नुभयो । नमूना परीक्षण पनि सदरमुकामका क्वारेन्टिनमा बसेकाहरुको मात्र भइरहेको छ । स्वास्थ्यकर्मीहरु भन्छन् नमूना परीक्षणको दायरा नबढाइदा गाउँमा कोरोनाको उच्च जोखिम देखिएको छ ।
Discussion about this post