काठमाडौं बैशाख ९ गते । कांग्रेस सभापति शेरबहादुर देउवाले कोरोना महामारीका बेला अध्यादेश ल्याउनु राजनीतिक इतिहासकै दुःखद घटना भएको टिप्पणी गरेका छन ।
सरकारले राजनीतिक दल र संवैधानिक परिषदसम्बन्धी अध्यादेश ल्याएको विरोधमा प्रेस विज्ञप्ती जारी गर्दै कांग्रेस सभापति देउवाले सरकारले अध्यादेश ल्याउनु र राष्ट्रपतिले तत्कालै जारी गर्नु दुबै दुःखद घटना भएको टिप्पणी गरेका हुन । ‘यतिबेलाको प्रधान दायित्व भनेको कोरोना र भोकमरीबाट नेपाली जनतालाई जोगाउनु हो । यो घडीमा सत्ताको उन्माद या खेल प्रस्तुत गर्नु भनेको नेपाली इतिहासकै सबैभन्दा दुःखद घटना हो र यो ‘बेमौसमी बाँसुरी’ हो’ देउवाले जारी गरेको विज्ञप्तीमा उल्लेख छ ।
सोमबारको मन्त्रिपरिषद बैठकले संसदीय दल वा केन्द्रीय समितिमा ४० प्रतिशत भए दल फुटाउन सक्ने गरी राजनीतिक दलसम्बन्धी अध्यादेश ल्याएको थियो । यसअघि संसदीय दल र केन्द्रिय समिति दुबैमा अनिवार्य रुपमा ४० प्रतिशत चाहिने व्यवस्थाका कारण दल फुटाउन सहज थिएन ।
यो अध्यादेश आएपछि अब नेकपा, राप्रपा, राजपा र समाजवादी पार्टीलाई फुट्न सहज हुनेछ । उस्तै परे प्रधानमन्त्री केपी शर्मा ओली फेरि चुनावमा गएर प्रधानमन्त्री बन्न पनि नेकपा फुटाउन सक्छन । यसका लागि उनले अहिल्यै बाटो खोलेका छन ।
कांग्रेस सभापति देउवाले अध्यादेश फिर्ता लिन माग पनि गरेका छन । कोरोना भाइरसको महामारीसँग जुध्नु परेका बेला अध्यादेश ल्याएर राजनीति नै धमिलो पार्न खोज्नु ठीक नभएको भन्दै देउवाले तत्काल दुबै अध्यादेश फिर्ता गर्न पनि सरकारसँग माग गरेका छन ।
Discussion about this post