त्रिवेणी मोडमा झड्प, प्रहरी र केही स्थानीय घाइते

बाँके बैशाख २३ गते ।
नेपालगन्जको त्रिभुवन मोडमा लकडाउन कार्यान्वयन गराउन खोज्ने प्रहरी टोलीमाथि स्थानीयले ढुंगा प्रहार गरेका छन् । त्यस क्षेत्रमा आज विहान पसलहरु खुलेका थिए । ति पसलहरु बन्द गराउनेक्रममा प्रहरी र स्थानीय व्यापारीबीच विवाद बढ्दै गएपछि स्थानीय ढुंगामुढामा उत्रिएका हुन् ।

स्थितीलाई नियन्त्रणमा लिन थप प्रहरी बोकेर गएको भ्यानमाथि स्थानीयले तोडफोड गरिदिएको बाँकेका एसपी वीरबहादुर ओलीले जानकारी दिनुभयो । तोडफोडबाट बा १ झ ८२८४ नम्वरको भ्यानका सिसा फुटेका छन् । प्रहरीसँग भएको उक्त झडपमा प्रहरी र स्थानीय केही घाइते भएका छन् ।

विहान ११ बजेदेखि स्थानीय प्रशासनले निषेधित क्षेत्र घोषणा गरेपछि व्यापारीहरुले त्योभन्दा पहिला पसलहरु खोल्न पाउनु पर्ने माग गरेका थिए । प्रहरीले लकडाउनमा खोल्न नपाइने भन्दै बन्द गराउन खोजेपछि विवाद बढेको हो ।

त्रिवेणी मोड नजिक रहेको संजय किराना स्टोर्सका संचालकले प्रहरीमाथी दुब्र्यवहार गरेपछि उनलाई नियन्त्रणमा लिने क्रममा प्रहरीमाथी ढुङ्गामुढा भएको प्रहरीले जनाएको छ ।