बाँके असार ५ गते ।
लकडाउन सुरु भएदेखि हालसम्म नेपालगन्जको जमुनाह नाकाबाट ५० हजारबढी नेपालीहरु भित्रिएका छन् । गएको चैत ११ गतेदेखि असार ४ सम्म ५६ हजार ९ सय ६० जना नेपाली भित्रिएको जमुनाह प्रहरी इन्चार्ज बिष्णु गिरीले जानकारी दिनुभयो ।
उहाँका अनुसार सबैभन्दा धेरै जेठ महिनामा ४३ हजार ८ सय ३८ जना नेपाली स्वदेश भित्रिएका छन् । त्योभन्दा अघि भित्रिनेको संख्या ११ हजार ९ सय ७ जना रहेको छ । असार १ देखि ४ गतेसम्म १२ सय १५ जना भित्रिएका छन् ।
इन्चार्ज गिरीले जेठको महिनामा भारतबाट नेपालीहरुलाई ल्याउनेक्रम सुरु भएकाले योबीचमा धेरै नेपाली स्वदेश भित्रिएका हुन् । योअवधिमा नेपालबाट २५ हजार ६ सय ७६ जना भारतिय आफ्नो देश फर्किएका छन् ।
पछिल्लो सातादेखि भने भारतबाट नेपालीहरु आउनेक्रम घट्दै गएको प्रहरीले जनाएको छ । कोरोना भाइरसको जोखिमसँगै रोजगारी समेत गुमेपछि भारतबाट पश्चिम तराइका नाका भएर स्वदेश फर्किने नेपालीको भिड विस्तारै कम भएको हो ।
भारतमा लकडाउन खुकुलो भएसँगै उद्योग, कलकारखाना खुल्न थालेपछि त्यहाँ रहेका नेपाली रोजगारीमा फर्किदा आउनेको चाप घटेको प्रहरीले जनाएको छ ।
Discussion about this post