मध्यपहाडी निर्माण अन्तिम चरणमा

अछाम असार ११ गते ।
सुदूरपश्चिमको मध्यपहाडी लोकमार्ग आयोजना निर्माणको काम अन्तिम चरणमा छ । चार खण्डमा काम भएको अछाममा ३ खण्डको काम सकिएको छ । आयोजनाको ६० किमि सडक अछाममा पर्छ ।

२०७३ वैशाख १६ मा सम्झौता भई २०७६ वैशाख १५ सम्म कालोपत्रे सक्ने लक्ष्य रहेको यो आयोजनाको अछाम खण्डको बीचमा विनायक–ठाटीखाँदमा पर्ने १६ किमि सडक निर्माणको काममा ढिलाइ भएको छ ।

सरकारले राष्ट्रिय गौरवको आयोजना घोषणा गरी निर्माण कार्य अघि बढाएको यो योजनाअन्तर्गत अछाम खण्ड कालोपत्रे गर्न मूल्य अभिवृद्धि करसहित १ अर्ब १७ करोड बजेट छ । जसमा विनायकदेखि ठाटीखाँदसम्म र ठाटीखाँददेखि मंगलसेनसम्मको सडक कालोपत्रेका लागि ३३÷३३ करोड रुपैयाँको ठेक्का स्वीकृत भएको थियो ।

अछामको तीन खण्डमा काम सम्पन्न भए पनि बीचको खण्डमा काम सुस्त गतिमा भएको आयोजनाको साइट इन्जिनियर मनीष सिंहले बताउनुभयो ।