यु–१५ महिला च्याम्पियनसिप फुटबलमा नेपाल र बङ्लादेश खेल्दै

काठमाडौं कात्तिक १९ गते ।
बङ्लादेशमा चलिरहेको १५ वर्षमुनिको साफ महिला च्याम्पियनसिप फुटबलमा आज नेपाल र बङ्लादेश खेल्दैछन् ।

खेल ढाकामा दिउँसो सवा ४ बजे सुरु हुनेछ । आयोजक बङ्लादेश र नेपाल दुवै चलिरहेको प्रतियोगितामा लगातार दोस्रो जितको प्रयासमा छन् ।

आफ्नो पहिलो खेलमा नेपाल र बङ्लादेश दुवैले भुटानलाई हराएका थिए । बिहीवार भएको खेलमा नेपालले भुटानलाई ७–० गोलले हराएको हो भने उद्घाटन खेलमा बङ्लादेशले भुटानलाई ८–० गोल अन्तरले हराएको थियो । नेपाल ३ अङ्क जोडेर दोस्रो स्थानमा छ ।बङ्लादेश ३ अङ्क जोडेर शीर्ष स्थानमा रहेको छ ।

भुटान अङ्कविहीन रहँदै पुछारमा छ । च्याम्पियनसिपमा आयोजक बङ्लादेशसँगै नेपाल र भुटानको सहभागिता रहेको छ । डबल राउण्ड रोबिन लिगको आधारमा हुने प्रतियोगिताको शीर्ष टोलीले उपाधि जित्नेछ ।