सशस्त्र प्रहरीको अगाडीबाट आउँछ तस्करीको सामान : एसपी र विओपीमाथि निगरानी बढाउन माग

बाँके बैशाख ८ गते ।
भारतबाट हुने अवैध चोरी, निकासी रोकथामका लागि नेपालगन्ज उपमहानगरपालिका–१४ मा सशस्त्र प्रहरी बल नेपाल नं. ३० गण हेक्वा, बागेश्वरी बाँकेको गण छ । एसपीको कमाण्डमा रहेको उक्त गणको मुख्य काम भारतबाट हुने चोरीपैठारी नियन्त्रण गर्ने हो, तर भारतबाट लाखौँ रुपैयाँको सामान र कुखुराका चल्ला भित्रिएपछि सशस्त्र प्रहरी बल बागेश्वरी गणको कामप्रति सर्वसाधारणले प्रश्न उठाउन थालेका छन् ।

चोरीपैठारी नियन्त्रणका लागि नेपाल–भारत सीमानाकामा विओपी र सय मिटरको दूरीमा विओपी अन्तरगतका सशस्त्र प्रहरी खटिदै आएका छन् । ठूलो संख्यामा सशस्त्र प्रहरी परिचालन गरिए पनि तस्करहरुले सामान नेपालगन्ज पुर्याउँदै आएका छन् ।
सशस्त्र प्रहरीको अगाडीबाट नेपालगन्ज भित्रिएको सामान नेपाल प्रहरीले नियन्त्रणमा लिँदै आएको छ ।

यसले पनि नाकामा खटिएको सशस्त्र प्रहरी तस्करसँग मिलेको भन्ने प्रष्ट हुन्छ । ‘भारतबाट ल्याएको सामान नेपाल प्रहरीले नेपालगन्जमा बरामद गर्नुले सशस्त्र प्रहरीको एसपीदेखि तल्लो तहका सशस्त्र प्रहरीको मिलोमतो छ भन्ने शंका गर्ने ठाउँ छ,’ एक स्थानीयले भने, ‘तस्करले सामान ल्याउँदा ड्यूटीमा रहेका सशस्त्र प्रहरी फोनमा कुरा गरेको जस्तो गरि नदेखेको भान गर्छन् । सर्वसाधारणले थोरै ल्याउँदा पनि आँखा लगाउँछन् ।’

बुधवार भारतबाट ल्याउँदै गरेको लाखौँ रुपैयाँ पर्ने ब्रोइलर कुखुराका चल्ला बाँके प्रहरीले बरामद गरेको छ । हिरमिनिया नाकाबाट ल्याउँदै गरेको कुखुराका चल्ला इलाका प्रहरी कार्यालय हिरमिनियाले बरामद गरेको हो । नाकामा खटिएका सशस्त्र प्रहरीकै अगाडीबाट ल्याएको चल्ला नेपाल प्रहरीले डुडुवा गाउँपालिका ६ अहिरापुर्वाबाट बरामद गरेपछि सशस्त्र प्रहरीको मिलोमतो उदांगिएको छ ।
चल्लाको कार्टुन टाउकोमा राखेर ल्याउँदै गरेको अवस्थामा नेपाल प्रहरीले नियन्त्रणमा लिएको थियो ।

सम्बन्धित समाचार

आधुनिक थ्रेसर मेसिनतर्फ बाँकेका कृषक आकर्षित

ताल भाडामा लिएर दोहोरो आम्दानी

देशका केही भू–भागमा वर्षा र हिमापातको सम्भावना

चार लाख ५० हजार रुपैयाँ बराबरको उक्त चल्ला नाकामा रहेका सशस्त्र प्रहरीकै अगाडीबाट ल्याएको प्रत्यक्षदर्शी बताउँछन् । ‘२४ सै घण्टा सशस्त्र प्रहरीले सीमानाकामा ड्यूटी दिन्छन् । उनीहरुले गर्ने ड्यूटीलाई हेर्ने हो भने सानो बस्तुसमेत ल्याउन मुस्किल पर्ने देखिन्छ, तर चार हजार पाँच सय कुखुराको चल्ला नाकाबाट पाँच किलोमिटर उत्तरमा बरामद हुनुले सशस्त्र प्रहरीको सेटिङ छ भन्ने बुझ्नु पर्छ,’ एक कुखुरापालक कृषकले भने ।

भारतको नानपाराबाट नेपाल ल्याउँदै गरेको कुखुराको चल्ला ल्याउनेहरुले नेपाल प्रहरी आउँदै गरेको सूचना पाएपछि भाग्न सफल भएका छन् । कुखुराका चल्ला ल्याउनेहरुले सूचना कहाँबाट पाए यसमा पनि शंका उब्जिएको छ । ‘तस्करसँग सेटिङ गरेको सशस्त्र प्रहरीले नै सूचना दिएको हुनुपर्छ,’ नाम नबताउने सर्तमा स्थानीयले भने, ‘नत्र प्रहरी आउँदै छ भन्ने जानकारी तस्करले कसरी पाए ? यसमा रहस्य लुकेको छ । गृहमन्त्री रबी लामिछाने र सशस्त्र प्रहरीका आइजिपी राजु अर्यालले बागेश्वरी गणका गणपति एसपी विमल डाँगी, गण मातहतका विओपीका इन्चार्ज र अन्य सशस्त्र प्रहरीमाथि निगरानी बढाउनु पर्ने जरुरी देखिन्छ ।’

सर्वसाधारणको थोरै सामानमा आँखा लगाउने सशस्त्र प्रहरीकै अगाडीबाट १२८० पाकेट खुकुरी चुरोट जमुनाह पुग्नुमा पनि सशस्त्र प्रहरीको हात भएको आशंका गरिएको छ । भारत लैजान लागेको चुरोट इलाका प्रहरी कार्यालय जमुनाहले बरामद गर्नुले पनि सशस्त्र प्रहरीको नियतमाथि खोट लागेको छ । सशस्त्र प्रहरीको गतिविधिमाथि नजर नलगाउने हो भने तस्कर र सशस्त्र प्रहरी मोटाउने र सर्वसाधारणले सास्ती भोगिरहनु पर्ने छ ।