जाजरकोट चैत ११ गते ।
भूकम्पले क्षतिग्रत जाजरकोटको जिल्ला प्रहरी कार्यालयको भवन पुनर्निर्माण गर्न लागिएको छ । गत वर्ष कात्तिक १७ गते जाजरकोटको रामीडाँडा केन्द्रविन्दु भई गएको भूकम्पले चर्किएर बस्न नमिल्ने भएपछि दातृ निकायको सहयोगमा पुनर्निर्माण गर्न लागिएको हो । जनतालाई शान्तिसुरक्षा दिन जिल्लामा जिल्ला प्रहरी कार्यालयसहित ३३ वटा प्रहरी युनिट रहेका छन् ।
सात वटा स्थानीय तहमा रहेका प्रहरी युनिटका भवन निर्माणमा जनताले जग्गा चन्दा दिए पनि बजेट अभावमा भूकम्पले क्षतिग्रस्त माटो, ढुङ्गाका कच्ची भाडाका घरबाट जोखिम मोलेर सेवा प्रवाह गरिरहेका छन् । जिल्ला प्रहरी कार्यालयका प्रमुख डिएसपी पुरुषोत्तमप्रसाद पाण्डेका अनुसार भूकम्पले क्षतिग्रस्त जिल्ला प्रहरी कार्यालयसहित ग्रामीण बस्तीमा रहेका भूकम्पबाट भएको क्षतिग्रस्त युनिटको विवरण गृह मन्त्रालय तथा सम्बन्धित निकायमा पेस गरेको बताए ।
२०३४ सालमा ढुङ्गा, माटोले निर्माण गरेको कच्ची भवन भूकम्पले चर्किएर बस्न नमिल्ने भएपछि सेवा प्रवाहमा समस्या भएको छ । तीनतले कच्ची टिनको छानाको भवनमा प्रशासनिक सेवा, महिला बालबालिका तथा ज्येष्ठ नागरिक सेवा केन्द्र, हिरासत थुनुवा कक्ष, सञ्चार सेवा प्रवाह गरिएको थियो । भवन बस्न नमिल्ने भएपछि त्रिपाल र टहरामुनिबाट पनि सेवा प्रवाह गर्न कठिन भएको डिएसपी पाण्डेको भनाइ छ । जिल्ला प्रहरी कार्यालयको प्रशासनिक भवन क्षतिग्रस्त भएपछि जनताले पाउने सेवा सहज रूपमा दिन नसकेको उनले बताए । दातृ निकायका प्रतिनिधिसँग भवन बनाइदिन आग्रह गरेपछि पुनर्निर्माण गर्ने तयारी भइरहेको उनले जनाए ।
अहिले जीर्ण भवन भत्काउन लागिएको छ । युनोपिओस दातृ निकायको सहयोगमा प्रशासनिक भवन निर्माणका लागि सोही भवन भत्काएर पुनर्निर्माणको काम अघि बढाइएको छ । दातृ निकायसँग प्रशासनिक भवन भूकम्पले बस्न नमिल्ने बनाएपछि पुनर्निर्माण गरिदिने प्रस्तावलाई स्वीकार गरेपछि साढे दुईतले पक्की प्रशासनिक भवन एक वर्षमा निर्माण सम्पन्न गर्ने तयारी भएको छ । जिल्लाका अन्य प्रहरी युनिट पनि बजेट अभावका कारण भाडाका क्षतिग्रस्त भवनबाट सेवा प्रवाह गरिरहेका छन् ।
केही वर्षअघि इलाका प्रहरी कार्यालय रिम्ना, इलाका प्रहरी कार्यालय सिम, इलाका प्रहरी कार्यालय रामीडाँडा, इलाका प्रहरी कार्यालय जगतीपुरमा पक्की भवन निर्माण भइसकेका छन् । इलाका प्रहरी कार्यालय दल्ली र प्रहरी चौकी कुदुमा सरकारबाट बहुवर्षीय बजेट प्राप्त भएर केही समयमै भवन निर्माण गरिने डिएसपी पाण्डेले बताए ।
Discussion about this post