निर्माण व्यवसायी के.सी. सम्मानित

विष्णु अधिकारी
बर्दिया मंसिर २० गते । बेलैमा काम सम्पन्न नगर्ने, गुणस्तरीय काम नगर्ने भन्दै आलोचित हुने गरेका निर्माण व्यवसायीहरु पछिल्लो समय सामाजिक उत्तरदायित्व वहन गर्न थालेका छन् । यसैको पछिल्लो उदाहरणको रुपमा बर्दियाका एक युवा व्यवसायी भने सामाजिक उत्तरदायित्व समेत वहन गरेका छन् । यसै क्रममा बर्दियाको मधुवन नगरपालिका वडा नं. ३ मा पर्ने भगतपुर देखि खाता जोड्ने करिब ४ सय मिटर ग्राभेल सडक निशुल्क निर्माण गरेर ब्ल्याकबक कन्ट्रक्सनका प्रोप्राइटर विमल के.सी. यसको उदाहरण बनेका छन । के.सी. ले ४ लाख मुल्य बराबरको माटो पटान गरी ग्राभेल गरेपछि वडाबासीलाई आवागमनका लागि सहज भएको मधुवन नगरपालिका वडा नं. ३ का वडाध्यक्ष नारायण मल्लले बताए । वडा कार्यालयको बजेटले अपुग भएपछि वडाध्यक्ष मल्लले ग्राभेलको गर्न केसीलाई आग्रह गरेपछि उनले खुला मनले उदाहरणीय कार्य गरेको अध्यक्ष मल्लले बताएका छन् । सबै निर्माण कम्पनीहरुले यस्ता किसिमका सामाजिक उत्तरदायित्व बहन गरेमा विकास निर्माणका लागि राज्यको मुखमात्र ताक्न नपर्ने उनको भनाई छ ।

यसैक्रममा श्री बालकुमारी सामुदायिक वन उपभोक्ता समुह मधुवन वडा नं. ३ ले स्वच्छ पानी र स्वस्थ जिवनका लागि निशुल्क फिल्टर तथा सम्मान कार्यक्रममा युवा व्यवसायी के.सी. लाई सम्मान समेत गरेको छ ।
कार्यक्रममा सामाजिक उत्तरदायित्व अन्तर्गत बालकुमारी सामुदायिक वनमा आवद्ध ५० घरधुरीलाई स्वच्छ पानी पिउनका लागि फिल्टर वितरण गरेको छ । उक्त सामुदायिक वनले अपुग भएको फिल्टर अन्य नपुगेका घरधुरीलाई क्रमश वितरण गर्दै जाने सामुदायिक वनका अध्यक्ष मस्त बहादुर के.सी. ले उक्त कार्यक्रममा जानकारी गराएका थिए । यसै क्रममा सामुदायिक वनमा योगदान पुर्‍याएका ७ जना तथा ज्येष्ठ नागरिक, एकल महिलालाई समेत दोसल्ला ओढाएर सम्मान गरेको छ ।