समाचार प्रभाव : अरबी खाँ हत्या आरोपित अफजल करिव दुई वर्षपछि पक्राउ

बाँके फागुन ९ गते ।
नेपालगन्ज उपमहानगरपालिका–२१, विर्ताका २२ वर्षीय मोहम्मद अरबी खाँको हत्या आरोपमा बाँके प्रहरीले एक जनालाई पक्राउ गरेको छ । उनको १८ चैत, २०८० मा घरदेखि करिव ५ सय मिटर पर रहेको इट्टा भट्ठा नजिकै घाँटी रेटेर हत्या भएको थियो । करिव दुई वर्षपछि बाँके प्रहरीले बिर्ताका ५३ वर्षीय अफजल पठानलाई पक्राउ गरेको छ ।

हत्या आरोपी पठानलाई नेपाल–भारत सीमा नाका नजिकबाट पक्राउ गरिएको बाँके प्रहरी प्रवक्ता डिएसपी दीपक पातलीले जानकारी दिए । ‘हत्यामा संलग्न मध्ये एक जनालाई पक्राउ गरि अनुसन्धान अगाडी बढाइएको छ,’ उनले भने ।
उनले लामो समयसम्म प्रहरीले अनुसन्धान गरेको बताउँदै नेपाल–भारत सीमा नजिक लुकेर बसेको पत्ता लागेपछि पक्राउ गर्न सफल भएको बताए । ‘सीआइवीले दिएको रिपोर्ट र जिल्ला प्रहरी कार्यालय बाँकेको अनुसन्धानबाट फेला परेको आधारमा अफजललाई पक्राउ गरिएको हो,’ उनले भने ।

अरबीको हत्यापछि अफजल फरार थिए । ‘अफजललाई प्रहरीले लामो समयदेखि पछ्याई रहेको थियो,’ डिएसपी पातलीले भने ।
हत्यामा संलग्नको खोजी गरि कानुन बमोजिम कारवाही गर्न पीडित परिवारका सदस्यले प्रहरीसमक्ष हारगुहार गर्दै आएका थिए । महिनौँसम्म जिल्ला प्रहरी कार्यालय बाँकेमा धाएका उनीहरुको न्याय पाउने आशा मरिसकेको थियो ।
‘न्याय पाउने आशा मारिसकेका थियौँ । हत्यामा संलग्न ब्यक्ति पक्राउ परेपछि न्याय पाउने आशा जागेको छ,’ अरबीका काका अब्दुल रहमान खाँले भने, ‘केहि राहत मिलेको छ । प्रहरी प्रतिको विश्वास बढेको छ ।’दुई वर्षसम्म हत्यारा पक्राउ पर्न नसकेपछि परिवारका सदस्यलाई पीडामाथि पीडा थपिएको उनले बताए ।
घटनामा स्थानीय मेराज खाँको संलग्नता भएको भन्दै पीडित परिवारले प्रहरीमा किटानी जाहेरीसमेत दिएका थिए । प्रहरीले उनलाई अनुसन्धानका लागि नियन्त्रणमा लिएर प्रमाण नपुगेको भन्दै मुक्त गरेको थियो ।

तर, प्रहरीले छाड्ने वित्तिकै उनी फरार भए । ‘प्रहरीले घटनामा संलग्न मेराजको पनि खोजी गरिरहेको छ,’ डिएसपी पातलीले भने, ‘उनी भारतमा लुकेर बसेको भन्ने खुलेको छ ।’
घटनास्थलबाट सर्ट फेला परेको थियो । उक्त कपडा मेराजको भएको अरवी खाँका आफन्तले दावी गर्दै आएका छन् । ‘रगतले लत्पतिएको उक्त कपडा मेराजको हो भन्नेमा कुनै आशंका छैन,’ अब्दुल रहमानले भने ।